Joanek ezer borratzen ez zuen borragoma zeukan. Txorroskilo doktoreari deitu zioten, ea gaixorik zegoen azter zezan, baina Txorroskilok ez zion inolako gaitzik aurkitu. Joanek, orduan, eskatu zion, mesedez, hizkuntzako lanaren hutsak/okerrak borratzeko, baina borragomak siesta egitea bakarrik zuen gogoan… eta lotara joan zen.

Estutxeko gainerako biztanleak biziki haserretu ziren.

Eta… Joanek motxilaren azpiko aldean gordetzen zuen borragoma txikitxo bat atera zuen. Hark bai ondo borratu! Koadernoa garbi uzten zuen! Inork ez zion Borragoma Lotiari jaramonik egin eta motxilaren hondoan geratu zen azkenean, koaderno eta liburu guztien azpian, galleta-apurren eta gozoki-paperen artean.

Eta bertan behera utzia eta abandonatua sentitu zenez… gehiago laguntzea eta Joanek eskatzen zion guztia borratzea erabaki zuen.

Batzuetan guk ere Borragoma Lotiaren jarrera izaten dugu: lan egiteko gogorik ez, etxean edo lagunei laguntzeko asmorik ez,… Saia gaitezen aldatzen, eta lagun dezagun laguntza eskatzen diguten guztietan, kostatu arren. Horrela, ondo sentituko gara gure buruarekin eta besteekin. Borragoma txikiak bezala, daukazun on guztia besteekin partekatu.