GAUZAK ONDO EGITEN

Gure lanean honako goiburua hartu behar dugu gogoan: "Hasitakoa bukatu beharra dago".

Askotan, lan berri bati ekiten diogunean, hasieran ilusio handiz eta gogoz hasten gara, baina berehala aspertzen gara. Are gehiago, lana luzea denean eta egiteko denbora luzea eskatzen digunean. Baina pentsatu zer gertatuko litzatekeen jende guztiak hori egingo balu. Aurkikuntza eta tresna berri ugari ez zituen inork asmatuko. Gu ez gara inoiz asmatzaile izango agian, baina gizarte honetako kide gara. Esaterako, etxera telebista konpontzera teknikari bat etorri eta "gaurkoz nahikoa egin dut eta bihar edo etzi etorriko nahiz berriro" esango baligu, zer pentsatuko genuke?

Hasitakoa bukatzea ezinbestekoa da. Ziurrenik behin baino gehiago  geure buruarekin gustura sentituko ginen lan luze eta zail bat azkenean bukatu dugulako, eta gure poztasuna ere halakoxea izan da, handia benetan, lan erraz bat eginda sentituko genukeena baino handiagoa. Agian ahalegin handiena eskatzen diguten gauzak dira baliorik handienekoak.