Ondo hasi.

Ondo ikasteko, ez dago ondo gosaltzea baino gauza hoberik. Horixe esaten dute adituek. Egia esan, eguneko lehenengo jatordua oso garrantzitsua da behar bezala ikasteko.

Ingalaterrako unibertsitate batean egindako ikerlan berri batek argi uzten du gosaltzen duten umeak gosaltzen ez dutenak baino hobeto kontzentratzen direla eskolako lanetan. Eta emaitzak hobeak dira egunero gosaltzen dutenengan.

Katie Adolphus andreak, ikerlanaren egile nagusiak, zera esaten du:

 “Ohiki gosaltzen duten umeak errazago heltzen dira unibertsitatera. Gosaltzen ez dutenei zailagoa egiten zaie eskolan kontzentratzea”.

Ikerlanaz geroztik, Magic Breakfast izeneko Gobernuz kanpoko Erakundeak adierazi du 8.000 umeri zabalduko diela doan gosaltzeko programa. Gaur egun Ingalaterrako 240 eskolari ematen dizkie gosariak; 160 eskola itxarote-zerrendan daude.

“Oporraldietan ume askok eskas jaten dute; hortaz, eskolako maisu-maistrekiko lankidetza estuan aritu behar da umeek ondo gosaltzen dutela ziurtatzeko (…). Ezin dugu  inola onartu ume horiek, gose direlako, eskola-goiz bat galtzea” esan du Carmel McConnell fundatzaileak.

Eta zuk, gosaltzen duzu? Egunero? Zer gosaltzen duzu? Norekin gosaltzen duzu?    

Eska diezaiogun Jainkoari zer gosaldu ez dutelako gosaltzen ez dutenen alde.