Lehenengo Emakumearen Nazioarteko Eguna Estatu Batuetan antolatu zen, 1908ko otsailaren azkeneko egunean. Egun horretan emakume sozialisten elkarteek emakumearen boto-eskubidearen eta bestelako eskubide politiko eta ekonomikoen alde manifestatzeko deialdiak egin zituzten.

Zergatik da gaur egun martxoaren 8a Emakumearen Nazioarteko Eguna? Aurrekari historikoak zehaztea ez da erraza, baina gertaera garrantzitsu bi omen daude jatorrian. Biak New Yorken jazoak. Lehenengoa, ehungintzan lan egiten zuten emakumeen martxa, 1857an. Milaka emakume irten ziren kalera New Yorkeko auzo aberatsetatik zehar martxan joateko eta lan-baldintza kaskarrengatik protestatzeko. Bigarrena, 1908an gertatu  zen. Urte horretan lantegi handietako 40.000 emakume jostunek greba egin zuten. Eskatzen zutena: sindikatuei biltzeko eskubidea, soldata hobeak, lanaldi laburragoa, trebakuntza eta umeek lanik ez egitea. Greban zeudela, 129 emakume langile hil ziren erreta, Cotton Textile Factory lantegian, Washinton Square-n, New Yorken. Lantegiko ugazabek giltzapean jarri zituzten, greba egin barik, lan egin zezaten. Ziur aski gertaera hauek martxoaren 8an edo ondoko egunetan jazo ziren.