Ondorengo hau denbora gutxi dela egunkari batean agertu zen albiste baten laburpena da.

“Orain berrogeita hamar urteko nerabeen eta gaurko nerabeen artean ez dago desberdintasun handirik. Ez da egia nolabaiteko mutazio morala gertatu dela. Edozein nerabe da apetatsua eta nartzisista. Edozeinek uste du munduaren zilborra dela. Eta edonork uste du nahi duena egiteko eskubidea daukala, mugarik gabe eta inposaketarik gabe. Hala ez balitz, ez litzateke nerabea izango, bildotsa baizik.

Gertatzen dena da gaur egungo nerabeak heziketa desberdina jaso duela. Orain ez dago gurasoen, maisu-maistren, auzokoen, osaba-izeben eta aitona-amonen aldetik presio sozialik. Orain ez dago ia etengabeko zainketarik, edo zigortua izan daitekeen edozer egiteko beldurrik. Orain ez dago ardura goiztiarrik: familiari laguntzeko lan egin beharrik, edo bizimodu hobea lortzeko gogor ikasi beharrik. Eta, batez ere, gaurko nerabeak telebistaren eta interneten etengabeko eragina du. Eragin horrek (…) bizitzan hartu behar duen jarrera zehazten dio. Eta hortik agertzen da modarekiko, ospearekiko eta arrakastarekiko obsesioa. Eta hortxe dago guztiaren gakoa. Tuenti edo Facebook sare sozialetan jartzen dituzten argazkietan erakusten duten oilarkeria patologikozko poseari begiratzea besterik ez dago (…)”

Egunkari berean, beste sekzio batean, hurrengo ipuina argitaratu zuten:

“Gizon bat herri batetik hirira joan zen, oso psikiatra famatuaren kontsultara. Honen etxera iritsi zenean, ikusi zuen, harrituta, gizon jakintsuaren altzari eta gauzak koltxoi bat, banku bi, aulki bat eta kandela bat zirela guztira. Horiek kenduta, gela hutsik zegoen.

Gizonak bere kontsulta egin zuen eta psikiatrak jakituriaz

erantzun zion. Baina, altzari gutxi haiek harrituta, galdetu zuen:

-       Galde diezazuket beste gauza bat?

-       Bai, jakina.

-       Non daude zure altzariak?

-       Non daude zureak?

-       Nireak non dauden? Ni pasadizoan baino ez nago hemen –esan zuen gizonak, ulertu gabe.

-       Baita ni ere.

Eta zer zerikusi dute testu hauek batak bestearekin?

Garizuma-aldi honetan nerabe izaten jarraitzera animatzen zaituztet, horrek on eta txar duen guztiaz, baina apaltasunez eta oilarkeriarik gabe izan zaitezte nerabe, mesedez, askotan bizimodu modernoaren materialismoak eraman gaitzan uzten baitugu eta, ondorioz, zoriontasuna eragiten duten gauza garrantzitsuak bistatik galtzen baititugu; zoriona ez dago gauza sofistikatuetan eta itxurazkoetan, bizitzeko moduan baizik.