Egun On!

Zer moduz asteburua? Ondo, ezta? Agurtu dituzu ostiraletik hona ikusi ez dituzun lagunak eta kontatu diezu egun hauetan nola pasatu eta zer egin duzun?

Bestalde, badakizu ikasturtea bukatzear dagoela, apurka-apurka amaierarantz  goazela. Azken bide-zatian gaude. Baina, une hauetan, gogor eutsi behar diogu, despistatu gabe.

Ez dakit istorio hau gogoan izango duzun, baina merezi du kontuan izatea. Esne-gainez beteriko ontzi batera salto egin zuten igel biren istorioa da.

Laster konturatu ziren handik irtetea ez zela gauza erraza izango. Saiatu ziren, baina alferrik.

-       Ezin gara hemendik atera. Gureak egin du –esan zuen batek..

-       Segi igerian. Nolabait aterako gara eta –esan zion besteak.

-       Alferrik da –erantzun zion lagunak-. Esne-gaina lodiegia da igeri egiteko, bigunegia salto egiteko, labainegia arrastaka egiteko. Tira, egunen batean hil beharko dugunez, hobe da gaur hiltzea. Ahaleginak egiteari utzi zion, etsi egin zuen, ... eta ito egin zen.

Beste igelak, ordea, igerian segitu zuen, amore eman gabe. Eta goizaldean, gurinezko tontor baten gainean zegoela konturatu zen; hala salbatu zen: igerian zebilela esne-gaina irabiatu eta gurin bihurtu zuen.

Igel txiki hura, ikusi duzunez, etengabeko ekinaren balioaz ohartu zen. Tira, nik aste honetan zure ikasle-lanari gogotsu ekin diezaiozun eskatzen dizut, azkenean, irabazi egingo duzu eta. A, eta gogoan izan ikasturtearen azken egun hauek oso garrantzitsuak direla.