GOGOETARAKO

Egun hauetan ikasturtearen martxa (egin dugun ahalegina, ikasi duguna, garatu dugun lana,…) aztertzen ari gara. Baina dena barne hartzeko eta zintzo jokatzeko, zenbat gauzarengatik zenbati eskerrak eman behar dizkiogun ere pentsatu beharko genuke. Zorionekoak gara eta gure zoriona aitortu behar dugu, hobetzeko eta urrutirago heltzeko nahia/asmoa/itxaropena galdu gabe. Ezin dugu aurrera begiratu lehenengo atzera begiratu gabe eta, oraintxe irakurri dugun testuko miraria jasotako samariar legendunak bezala, Jaunari ondasun guztiengatik eskerrak eman gabe.

Gaurko eguna eskerrak emanez hasiko dugu:

-       Eskerrak, “Eguna alaitu didazu” esatean nire eguna alaitu duen pertsona horrengatik.

-       Eskerrak, besteen alde errezatzen irakatsi didazulako, askotan ez baitut horiei laguntzeko beste modurik.

-       Eskerrak, bizitzaren seriotasuna gorabehera, beti daukagulako barre-algarak egiteko adiskide bat.

-       Eskerrak, egunero gertatzen diren eta bizitza handi egiten duten gauza txikiengatik.

-       Eskerrak, begiez irribarre egiten diguten pertsona gozo eta bihotz-zabal horiengatik.

-       Eskerrak, egina dugun eta oraindik egiteko dugun bideagatik.

-       Eskerrak, bakardadeagatik eta isiltasunagatik, baina baita lagunengatik, musikarengatik, belarrira esaten dizkiguten hitzengatik,… ere.

-       Eskerrak, ikasitako eta oraindik ikasteko ditugun gaiengatik.

-       Eskerrak, mendi-tontorrera iristeko adoreagatik eta zoriontasuna eta esperientzia atseginak tontorrera igotzen den artean gertatzen direla ohartzeagatik.

-       Eskerrak, zergatik eta nori eskertu dugulako.

-       Eskerrak,… (gehitu bakoitzak nahi dituenak)...