EBANJELIOA: «Lehen-semea izan zuen; oihaletan bildu eta abere-aska batean ezarri zuen, ez baitzen ostatuan haientzat tokirik».

Lagun batek zera esan zidan behin: niretzat egunero da Eguberri, egunero jaiotzen baita Jauna; ez dut abendura arte itxaron behar aita, anaia edo adiskidea besarkatzeko eta bihotzak Jainkoaren bakeaz eta maitasunaz bete ditzaten desiratzeko. Beti nago prest kalte edo min egin didanari barkatzeko, bakeak egiteko eta adiskidetzeko urte osoan itxaron gabe. Ahal dudan guztietan karitate-obrak egiten saiatzen naiz eta behar duenari niretik ematen diot.

Egun orotan da Eguberri jendea elkartasunean eta maitasunean bizi den etxeetan, senar-emazteak, gurasoak eta seme-alabak elkar ulertzen eta maitatzen saiatzen diren etxeetan.

Egun orotan da Eguberri landa-soroetan, lantegietan, bulegoetan, eguneroko lana egiten duten pertsonengan, egoismorik eta bekaizkeriarik gabe, euren lana eginez gizartearen onerako ari direla pentsatzen duten horiengan.

Egun orotan da Eguberri ospitaleetan, osasun-langileak, nekatu gabe, gaixotasunaren eta heriotzaren aurka eta biziaren alde ahalegintzen diren leku horietan.

Egun orotan da Eguberri eskoletan, irakasleek hitzaren eta ereduaren bidez ikasleak hezten eta prestatzen dituzten ikastegietan.

Egun orotan da Eguberri bizitza osoa Jainkoari eta Elizari eskaintzen dieten eta konpromiso hori zintzotasunez bizitzen saiatzen diren pertsonengan. 

Egun orotan da Eguberri gure ikastetxean, lana ondo egiten saiatzen diren pertsonengan, elkarri laguntzen eta lankideen eta ikaskideen arazoak sentitzen eta “arintzen” ahalegintzen direnengan. Egunero da Eguberri gure ikastetxe honetan.