Astea hasteko beti bezala ebanjelioko zati bat irakurriko dugu, atzokoa oso garrantzitsua da. Jesusek bere proiektua aurkezten digu, bere garaian erabat berria izan zen, mezu iraultzaile bat zen, dena hankaz gora jarri zuen. Gaur egun ikusiko dugunez Jesusek ere gure bizitzaren ohiturak aldatzea eskatzen digu.

Entzungo dugu:

Egun batean Jesus mendiaren tontorrean zegoen. Inguruan zituen ikasleei begiratu, eta esan zien:

-Zorionekoak behartsuak, haiek baitute Jainkoa errege; zorionekoak gose direnak, aseko baitira; zorionekoak negar egiten dutenak, laster barre egingo baitute.

Ikasleak harrituta geratu ziren hitz horiekin; Jesusek jarraitu zuen:

-Zorionekoak jazartuak, nire adiskide izango baitira eta saria jasoko baitute Jainkoaren Erreinuan.

Mendiaren tontorrean Jesusek gauza ederrak aipatzen zituen. Harik eta hau esan zuen arte:

- Maita itzazue etsaiak eta barkatu beti. Izan zaitezte errukitsuak pertsona guztiekin. Ez gelditu besteen akatsei begira eta seinalatzen; begiratu lehenik zeuen akatsei, eta saiatu zuzentzen.

Entzuten ziotenek harrituta geratu ziren eta askok dena utzi zuten hari jarraitzeko, baldintzarik gabe.