Son pouca cousa, pode dicir o misto, pero, aínda non me podo comparar co sol, alumo. 

Por breves momentos son capaz de rachar a escuridade e sinalar o camiño perdido. E se me poño polas malas son capaz de causar un grande incendio. 

Pouca cousa é tamén o temón dun barco comparado co casco, pero é esencial para dirixilo.

A miña esmola é pequena, díxolle o neno ao pobre. Sei que non che vou quitar a túa necesidade totalmente, mais eu espero que recollas hoxe para comer se todos os que pasan ao teu carón che dan o mesmo. 

Un ladrillo é tamén pouca cousa, mais unido a outros moitos constrúe a casa. Igual que dicimos que "un gran non fai celeiro, pero axuda o seu compañeiro".

A area a penas podes collela gran a gran. Ten que ser a mancheas. Pero dela están feitas as praias. E, levada polo vento forma dunas e desertos.