Moitos viven pensando en cando chegará o fin de semana, ou as vacacións, para esquecerse do colexio e facer o que cada un lle dea a gana: quedar na cama ata que un queira (ou a nai o mande erguer), ver a “tele” cando me apeteza, saír cos amigos, ir xogar...

          Pero..., pensade cales serían as consecuencias se non viñésedes á clase e non tivésedes a oportunidade de estudar e educarvos que tedes agora, (Pódese invitar a que expresen esas consecuencias)

          En tempos de Xoán Bautista de La Salle, iso que nos parece, ás veces, o ideal, era o normal: os nenos non ían á escola, e os seus pais non se preocupaban por darlles unha educación. A ignorancia provocaba o feito de que os pobres nunca puidesen saír da súa situación de miseria, de que se aproveitasen deles, de que fosen manexados por reis e gobernantes sen escrúpulos... En ocasións levaba á delincuencia, como único xeito de saír adiante.

          Hoxe en día, en moitos países do terceiro mundo, moitos mozos e mozas non poden estudar porque non hai unha escola á que acudir; porque, se a hai, non a poden pagar; ou porque teñen que axudar na casa e non lles queda tempo para outra cousa.

          Entre nós todas estas situacións xa non se dan. Todos os mozos e mozas van a unha escola. Outra cousa é se aproveitan esa oportunidade para aprender e educarse como persoas responsables e cristiás.