GOGOETARAKO

Badakizu nola hobe dezakezun eguneroko gauzetan zure edukazioa? Autobusean, trenean, metroan,… uzten diezu beste batzuei esertzen eta pasatzen ala zeure lekuan geldi geratzen zara?

Pasatzen uztea kortesiaren, adeitasunaren eta edukazio onaren seinale da. Hala ere, pertsona askori “ahazten” zaie pasatzen uztea eta, zoritxarrez, askoz gehiago gertatzen da gazteen artean.

Edozein pertsonari utzi behar diogu pasatzen,… baina bereziki haurdun dauden emakumeei, adineko pertsonei eta desgaitasunen bat dutenei.

Horien lekuan jarri beharko genuke. Egunen batean, agian, guk ere arreta handiagoa behar izango dugu eta orduan jendearen kortesia edo adeitasuna bihotzez eskertuko dugu, gauzak erraztuko baitizkigu.

Horregatik, komeni da gure Don Boscok esaten zuena gogora ekartzea. “Kristau on eta herritar zintzo” izan behar dugu. Autobusera, trenera, igogailura edo eraikin batera  sartzerakoan, laguntza behar duen inor agertzen bada, pasatzen utzi beharko diozu. Eserlekua behar badu, esertzen utzi beharko diozu.  Behar ez duela pentsatzen baduzu ere, utziozu pasatzen, utziozu esertzen. Eskerrak emango dizkizu eta zu zure buruarekin ondo sentituko zara pertsona horri lagundu nahi izan diozulako.

Askotan, jendea mugikorraz distraituta joaten da, inguruan gertatzen denaz ohartu barik, eta ez da konturatzen ondokoak lekua edo eserlekua behar duela.

Leku batera sartzean, irteten ari denari pasatzen utzi behar diogu. Bai etxeko sukaldean, ikastetxeko gelan edo denda batean. Edozein lekutan.

Gauza hauek kontuan hartzen ez dituzten pertsonak ikusten dituztenek askotan gauza bera egitea erabakitzen dute: “niri pasatzen uzten ez badidate, nik ere ez diot inori pasatzen utziko. Ez naiz izango pasatzen uzten duen lelo bakarra”. Baina pasatzen uzteak ez gaitu lelo egiten, eta ez uzteak egoista egiten gaitu. Pentsa dezagun beti besteengan. Norbaiti pasatzen uzten, eserlekua eskaintzen edo edozertan laguntzen diozunean, mundu hau hobetzen ari zara… baita zure burua ere.