Lectura do Evanxeo: Xoán 19, 25-28

Durante trinta anos María está á beira de Xesús. Nos tres restantes acompáñao nos momentos máis importantes. Non podía faltar, por suposto, no momento no que ía morrer.

Nesta circunstancia aproveita Xesús para darlla como nai a Xoán, o seu discípulo amado, e a todos nós. Por iso María está sempre ó noso lado, como estivo ó lado de Xesús.

Nas nosas vidas tamén se fai presente, ás veces, a tristura, a dor, e o sufrimento. Vivimos ás veces sen paz, intranquilos e anguriados. Precisamos alguén que nos tenda unha man.

María sempre está presente nas nosas vidas. Ela preocúpase de nós. Ela pode sacarnos desas situacións e enchernos de nova ilusión. Ela é a nosa nai, e a nai entende ó fillo, compréndeo. Non teñamos reparos en acudir á nai, sempre que o precisemos.