Don Bosco, coñécese por este nome no mundo enteiro, naceu de humilde familia en Italia no ano 1815. Pastor dende moi pequeno, malabarista na súa adolescencia, seminarista moi aplicado na súa mocidade, capelán de presos cando se ordenou de crego, devotísimo sempre de María Auxiliadora, amigo namorado da mocidade ata a súa morte, fundador... finou en 1888.

Morreu?... Non, Don Bosco segue vivo en miles de salesianos que seguiron as súas pegadas, en centos de miles de persoas que se colocaron baixo a súa protección... Si, Don Bosco segue vivindo en miles de homes, de mulleres, de xoves, adolescentes e nenos, que frecuentan as aulas dos seus relixiosos e relixiosas. Ata Mao Tse Tung, o gran xefe comunista chinés mandou ós seus 1.100 millóns de compatriotas: "Honrarás a Xoán Bosco, que coidou dos humildes e educou os obreiros".

Puido ser diplomático, xeneral, bispo... calquera cousa; pero a súa vocación foi educador da mocidade. A súa ledicia contaxiosa, a súa virtude sinxela e heroica, a súa confianza en Deus e nos homes foron o imán que, ó abeirarse a el os xoves, achegábaos tamén a Deus.