Contan que no mar había un peixe eternamente insatisfeito. Quería saber onde estaba o océano e por máis que llo indicaban, non o vía. El só vía auga.

E nós? ¿Non somos coma ese peixe, á busca do que temos diante do nariz? Empeñámonos en buscar o Nadal onde non o podemos atopar: entre os regalos, os anuncios da propaganda, as comidas especiais, o gastar máis... e un longo conxunto de cousas que deixan o corazón máis baleiro que antes.

Sen embargo o Nadal é coma a auga do océano, que a temos tan preto que non a vemos. Desde que Deus se fixo home, é Nadal sempre que vivimos de acordo coa súa mensaxe, porque entón estamos a facer que Xesús se faga máis presente entre nós. 

Por iso é Nadal cando compartimos, cando perdoamos, cando pensamos nos outros, cando somos capaces de renunciar a algo noso para que os outros vivan mellor...