Había unha vez un home que calumniou grandemente a un amigo seu, e todo pola
envexa que lle tivo ao ver o éxito que este alcanzara. Tempo despois arrepentiuse da
ruína que trouxo coas súas calumnias a ese amigo, e visitou un home moi sabio a quen
lle dixo:
- “Quero arranxar todo o que fixen, como podo facelo?” O sabio respondeu:
- “Toma un saco cheo de plumas lixeiras e pequenas e sóltaas onde queira que vaias”. O
home moi contento por aquilo tan fácil tomou o saco cheo de plumas e ao cabo dun día
soltáraas todas. Volveu onde o sabio e díxolle:
- “Xa terminei” Entón o sabio contestou:
- “Esa era a parte fácil... agora debes volver encher o saco con esas mesmas plumas que
soltaches, sae á rúa e búscaas”.

O home sentiuse moi triste pois sabía o que iso significaba, e non puido xuntar case
ningunha. Ao volver o home sabio díxolle:
- “Así como non puideches xuntar de novo as plumas que voaron co vento, así mesmo o
mal que fixeches voou na fala da xente e o dano xa está feito. O único que podes facer
agora é pedirlle perdón ao teu amigo, pois non hai forma de arranxar o que fixeches”.