EBANJELIOA: Mateo 10, 5. 7. 16. 40
«Hamabiok bidali zituen Jesusek, oharpen hauek eginez… Hots egin Jainkoaren erregetza gainean dela… Hara, ardiak otso artera bezala bidaltzen zaituztet. Izan zaitezte, bada, sugeak bezain zuhur eta usoak bezain xalo… Zuek onartzen zaituztenak neu onartzen nau, eta ni onartzen nauenak bidali nauena onartzen du».

IRAKURGAIA
Bai, margolariek beren koadroak diseinatzen dituzte, musikariek beren abestiak, olerkariek beren olerkiak, … eta zu, gaztea zarenez, zure bizitza diseinatzen ari zara. Hartzen duzun erabaki bakoitzaz, egiten duzun gauza bakoitzaz … diseinatzen duzu; horiek dira zure bizitzako pintzeladak.

Gaur horrezaz ohartzera eta zeure burua nola modelatzen duzun ikustera gonbidatzen zaitugu. 

-       Zure gorputza zaintzean: osasuna, kirola, garbitasuna, elikadura.

-       Zure burua zaintzean: ikastea, irakurtzea, oroitzea,…

-       Zure sentimenduak zaintzean: alaitasuna, tristezia, maitasuna, gorrotoa, beldurra, lotsa, errua,…

-       Zure gogoa zaintzean: bakea, isiltasuna, otoitza, fedea, askatasuna,…

Denak dira zure bizitzako alde garrantzitsuak; erabaki orok eragina du horiengan eta, jakina, eragina du zugan. Erabaki ondo zer egiten duzun, zure burua nola zaintzen duzun, norekin zabiltzan, nola jokatzen duzun, zer gauza esperimentatzen dituzun/ez dituzun... 

Pentsatu, unetxo batean, zure bidean agertzen diren pertsonak, nolabait, zure bizitzaren parte direla. Gaur eskatuko nizuke zure bizitza modu berezian zaintzeko, hortaz, zure bizitzaren parte direnak ere ondo zaintzeko.

Baliagarriak izan dakizkizuke konfiantzazko pertsonen laguntza eta aholkua. Eta baliagarria izan dakizuke bizi-ereduen erreferentzia. Salestar ikastetxetik hara, bi proposatzen dizkizugu: Jesus eta Don Bosco.

Badugu horiengandik zer ikasi; biengandik. Eurak egiazko artistak izan ziren beren bizitzetan, eta beste batzuei artista izaten irakatsi zieten. Geuregana dezagun ongi sakontasunean eta zentzuz bizitzeko artean maisu bikain izan ziren hauek irakasten digutena.