Nun cantiño perdido dunha páxina do xornal, apareceu este titular: "Un nixeriano morreu esta noite nas rúas de Madrid, debido á onda de frío que estamos a padecer". Non aparecía o seu nome, nin a súa idade, nin o seu traballo... Simplemente era "un nixeriano".

Cando morreu Chu-lín, o osiño panda do zoo de Madrid, ríos de tinta correron por toda a prensa nacional. Semella que nos importa máis a vida do osiño cá do nixeriano.

Non é sorprendente? Chegamos ao máximo da deshumanización. Que alguén morra de frío nas rúas é alarmante; pero máis alarmante é que o saibamos e sigamos tan tranquilos.

Por favor, cando se achegan as festas do Nadal, pensa nas moitas persoas que, como María e Xosé, non teñen pousada. Se queremos vivir o Nadal con senso cristián, é a eles a quen temos que achegarnos.