Unha vez prendeu lume nun circo ambulante, logo de acampar nas aforas dunha aldea. 

Os artistas, que xa estaban vestidos para a actuación, puxéronse a apagalo e o director enviou o pallaso para pedir axuda aos aldeáns, pois as chamas podían non soamente destruír o circo senón poñer en perigo a aldea. 

O pallaso correu axiña á praza da aldea e informou a berros a todos para que viñesen axudar a apagar as lapas.

Os aldeáns riron e aplaudiron esta nova forma de atraelos ao  espectáculo.

O pallaso suplicou e insistiu en que non estaba representando un papel, senón que había lume e que tamén a aldea estaba en perigo. 

Canto máis rogaba máis rían os aldeáns, ata que o lume chegou, a través dos campos, ata a aldea mesma.